చిత్రం: అఖండ2: తాండవం
నటీనటులు: నందమూరి బాలకృష్ణ, సంయుక్త, ఆది పినిశెట్టి, హర్షాలీ మల్హోత్ర, జగపతిబాబు, కబీర్ దుహాన్ సింగ్, శ్వాస్థ ఛటర్జీ, రాన్సన్ విన్సెంట్, అచ్యుత్కుమార్ తదితరులు
సంగీతం: ఎస్.ఎస్. తమన్
సినిమాటోగ్రఫీ: సి.రామ్ ప్రసాద్
ఎడిటింగ్: తమ్మిరాజు
నిర్మాత: రామ్ ఆచంట, గోపి ఆచంట, ఇషాన్ సక్సేనా
సమర్పణ: ఎం తేజస్విని నందమూరి
రచన, దర్శకత్వం: బోయపాటి శ్రీను
విడుదల: 12-12-2025
బాలయ్య–బోయపాటి కాంబినేషన్పై ఉండే అంచనాలు సాధారణ సినిమాలకు మించి ఉంటాయన్న సంగతి తెలిసిందే. ‘సింహా’, ‘లెజెండ్’, ‘అఖండ’ సినిమాలు ఇచ్చిన హై వోల్టేజ్ ఎనర్జీ వల్ల, ‘అఖండ 2: తాండవం’ ఏ స్థాయి తాండవం చేయబోతుందా అన్న ఉత్సాహంతో ప్రేక్షకులు థియేటర్లకు చేరుకున్నారు. యూనిట్ నుంచి వచ్చిన టీజర్లు, బాలయ్య అఘోర లుక్, తమన్ బ్యాక్గ్రౌండ్ స్కోర్ అన్నీ కలిసి ఈ సీక్వెల్పై అంచనాలను మరింత పెంచేశాయి. వాయిదాలు, వివాదాలతో చివరకు థియేటర్లలో అడుగుపెట్టిన ‘అఖండ 2’ అభిమానుల్లో మాస్ ఫెస్టివల్ను మొదలుపెట్టింది.
కథేంటి
సినిమా కథ ఈసారి సరిహద్దుల దాకా విస్తరించింది. టిబెట్ ప్రాంతంలో చైనా ఆర్మీ ఇండియాపై బయోవార్ ప్లాన్ చేస్తుంది. మహా కుంభమేళాలో వైరస్ వదులడం వల్ల ప్రజలు క్షణాల్లో అపస్మారక స్థితిలోకి వెళ్లిపోవడం—ఈ ప్రమాదానికి పరిష్కారంగా DRDOలో పనిచేసే 17 ఏళ్ల ప్రతిభావంతురాలు జనని యాంటీడోట్ కనిపెట్టడం కథకు బలమైన పాయింట్గా నిలుస్తుంది. శత్రువుల దాడుల్లో శాస్త్రవేత్తలందరూ మరణించడంతో జనని ఒక్కరే ఆ యాంటీడోట్తో బతికి బయటపడుతుంది. ఆమెను మౌనంగా వెతుకుతుంటారు చైనా కమాండోలు. ఇదే సమయంలో దేశాన్ని కాపాడేందుకు అఘోర శక్తి మరింత పెంచుకున్న రుద్ర సికిందర్ అఘోరా రంగంలోకి దిగుతాడు. అనంతపురం ఎమ్మెల్యే బాలమురళీకృష్ణతో జననికి ఉన్న సంబంధం ఏమిటి? అఘోరా శత్రువులను ఎలా ఎదుర్కొన్నాడు? సనాతన ధర్మాన్ని ఎలా నిలబెట్టాడు? అనే ప్రశ్నలకు మాస్ టోన్లో సమాధానాలు లభిస్తాయి.
ఎవరెలా చేశారంటే
నటనా పరంగా బాలయ్య ఈ చిత్రంలో పూర్తి స్థాయి వన్ మేన్ షో. అఘోరా పాత్రలో ఆయన చూపిన ఆరా, డైలాగ్ డెలివరీ, శివతాండవం సన్నివేశాల్లో కనిపించే దివ్యత్వం అన్నీ స్క్రీన్పై ఎలివేట్ అయ్యాయి. ఎమ్మెల్యే బాలమురళీకృష్ణ పాత్రలో కూడా ఆయన స్టైలిష్గా కనిపించారు. ఫస్ట్ హాఫ్లో రాజకీయ నేపథ్య పాత్ర, సెకండ్ హాఫ్లో దైవిక శక్తుల సమాహారం రెండు పాత్రల్లోనూ బాలయ్య తన ప్రత్యేక ఎనర్జీ చూపించారు. హర్షాలి మల్హోత్రా నటించిన జనని పాత్ర సినిమాకు భావోద్వేగ బలం ఇచ్చింది. ఆది పినిశెట్టి చేసిన నేత్ర అనే ప్రతినాయక పాత్ర అద్భుతంగా ప్రారంభమై చివరికి సిల్లీగా ముగించడం మాత్రం స్క్రిప్ట్ లోపమనే చెప్పాలి. సంయుక్త పాత్ర చిన్నదే అయినా జాజికాయ పాటలో తనదైన అందంతో మెరిసింది.
టెక్నికల్ వైపు చూస్తే థమన్ మళ్లీ సినిమాకు ప్రాణం పోశాడు. అఖండ థీమ్ వచ్చిన క్షణమే థియేటర్లో పూనకాలు మొదలవుతాయి. కొన్ని చోట్ల సంగీతం అతిగా ఉన్నా, మాస్ ప్రేక్షకులకు అదే కావాలి. కెమెరా వర్క్ బలంగా ఉంది. ముఖ్యంగా హిమాలయ దృశ్యాలు, కుంభమేళా షాట్లు సినిమాకు వేరే రేంజ్ ఇచ్చాయి. కానీ VFX మాత్రం పలు చోట్ల కృత్రిమంగా, అప్రయత్నంగా కనపడింది. ఎడిటింగ్ మరింత కట్టుదిట్టంగా ఉండాలి. బోయపాటి తన స్టైల్కు తగ్గట్టే కథను పెద్దదిగా తీర్చిదిద్దారు కానీ కొత్తదనం ఇవ్వడంలో కొంచెం తడబడ్డారు.
సినిమా ఎలా ఉందంటే—ఇది క్లియర్గా ఫ్యాన్స్ కోసం తీసిన మాస్ ఫెస్టివల్. కథ సింపుల్, నారేషన్ నిడివి కొంచెం ఎక్కువ, లాజిక్ పుంజాలన్నీ పక్కనపెట్టి చూసే రకం. కానీ అఘోరా ఎంట్రీతో వచ్చే హై, దైవిక ఎలివేషన్లు, జాతీయభావన, సనాతన ధర్మపు ప్రసంగాలు కలిసినప్పుడు‘అఖండ 2’ తన లక్ష్యం చేరుతుంది. స్క్రిప్ట్ బలహీనంగా ఉన్నా, బాలయ్య పవర్ స్క్రీన్పై దాన్ని మరిచిపోయేలా చేసింది. మొత్తం మీద ‘అఖండ 2’ ఫ్యాన్స్కు పండగ, మాస్ ఆడియన్స్కి ప్యూర్ ఎంటర్టైన్మెంట్, జనరల్ ఆడియన్స్కు మాత్రం మిక్స్డ్ అనుభవం. కానీ బాలయ్య తాండవం చూడాలనుకునే వారికి టికెట్ ధర పూర్తిగా వసూలే
