వాతావరణ మార్పులు కేవలం ఉష్ణోగ్రతల పెరుగుదలకే పరిమితం కావడం లేదు — అది భారత ఆర్థిక వ్యవస్థపై, ప్రజల ఆరోగ్యంపై కూడా భారీ ప్రభావం చూపుతోంది. ప్రతిష్ఠాత్మక లాన్సెట్ సంస్థ తాజాగా విడుదల చేసిన ‘పర్యావరణ మార్పులు – ఆరోగ్యంపై ప్రభావం 2025’ (Countdown on Health and Climate Change 2025) నివేదిక ప్రకారం, భారతదేశం గత ఏడాది 24,700 కోట్ల పని గంటలను వేడిగాలుల కారణంగా కోల్పోయింది. ఈ నష్టం రూ.17.11 లక్షల కోట్ల (సుమారు 194 బిలియన్ అమెరికన్ డాలర్లు) ఆర్థిక నష్టంతో సమానమని పేర్కొంది.
నివేదిక ప్రకారం, 2024లో ప్రతి భారతీయుడు సగటున 420 పని గంటలను కోల్పోయాడు. ఇది 1990–99 మధ్యకాలంతో పోలిస్తే 124 శాతం అధికం. వాతావరణ మార్పులు, వేడి తరంగాలు, అడవుల్లో అగ్నిప్రమాదాలు, కాలుష్యం కలిసి భారత ఆర్థిక వ్యవస్థను తీవ్రంగా దెబ్బతీశాయని ఈ అధ్యయనం స్పష్టం చేసింది.
నివేదికలో ప్రధానాంశాలు:
-
వేడి గాలుల ప్రభావం: గతేడాది ప్రతి భారతీయుడు సగటున 19.8 రోజులపాటు వేడిగాలులను ఎదుర్కొన్నాడు. అందులో 6.6 రోజులు వాతావరణ మార్పుల కారణంగా వచ్చాయి.
-
పని గంటల నష్టం: వేడి తరంగాల వల్ల మొత్తం 24,700 కోట్ల పని గంటలు కోల్పోయాయి.
-
రంగాల వారీగా నష్టం: వ్యవసాయ రంగం 66%, నిర్మాణ రంగం 20% పని గంటల నష్టాన్ని చవిచూశాయి.
-
ఆరోగ్య ముప్పు: అడవులు కాలిపోవడం వల్ల విడుదలైన పీఎం 2.5 స్థాయి కాలుష్య రేణువుల కారణంగా 2020–24 మధ్య సగటున 10,200 మంది మరణించారు.
-
వేడి కారణంగా మరణాలు: 1990ల నుంచి అధిక ఉష్ణోగ్రతలతో సంభవించే మరణాలు 23% పెరిగి సంవత్సరానికి 5.46 లక్షలకు చేరాయి.
-
వ్యాధుల పెరుగుదల: ప్రపంచవ్యాప్తంగా డెంగీ కేసులు 1950లతో పోలిస్తే 49% పెరిగాయి.
ప్రపంచం శిలాజ ఇంధనాలపై ఆధారపడటాన్ని తగ్గించకపోతే, వాతావరణ మార్పుల ప్రభావం మరింత తీవ్రమవుతుంది. ఇది ఆరోగ్యం, ఆర్థిక స్థిరత్వం, జీవన నాణ్యత అన్నిటినీ ప్రమాదంలో పడేస్తుందని లాన్సెట్ నివేదికలో సూచించారు. భారత్లాంటి వేడిమండల దేశాలు తక్షణ చర్యలు తీసుకోవాల్సిన అవసరం ఉందని, లేకపోతే వచ్చే దశాబ్దాల్లో ప్రజల జీవనోపాధిపై తీవ్రమైన ముప్పు ఏర్పడుతుందని నివేదిక స్పష్టం చేసింది.
