టాలీవుడ్లో కుర్ర హీరోల జాబితాలో నవీన్ పొలిశెట్టి పేరు ప్రత్యేకంగా నిలుస్తుంది. నటుడిగా మాత్రమే కాదు, రచయితగా కూడా తనకంటూ ఓ ప్రత్యేక ముద్ర వేసుకున్న అరుదైన హీరో నవీన్. ఏజెంట్ సాయి శ్రీనివాస ఆత్రేయ, జాతిరత్నాలు లాంటి సినిమాలతో తన కామెడీ టైమింగ్కు ప్రేక్షకులు బ్రహ్మరథం పట్టారు. ఆ తర్వాత డీసెంట్ హిట్గా నిలిచిన మిస్ శెట్టి మిస్టర్ పొలిశెట్టి తర్వాత మూడేళ్ల గ్యాప్ తీసుకున్న నవీన్, ఈ సంక్రాంతికి ‘అనగనగా ఒక రాజు’తో ప్రేక్షకుల ముందుకొచ్చాడు. గ్రామీణ నేపథ్యంలో, పక్కా కామెడీ ఎంటర్టైనర్గా రూపొందిన ఈ సినిమాపై ట్రైలర్, పాటలతోనే భారీ అంచనాలు ఏర్పడ్డాయి. “జాతిరత్నాలు లాంటి మరో నవ్వుల తుపాను వస్తుందా?” అనే ప్రశ్నతోనే ప్రేక్షకులు థియేటర్లకు వెళ్లారు. మరి ఆ అంచనాలను ఈ సినిమా అందుకుందా? నవీన్ మరోసారి నవ్వులతో ప్రేక్షకులను మెప్పించాడా? రివ్యూలో తెలుసుకుందాం…
కథ
గౌరవపురం అనే ఊరిలో జమీందార్ కుటుంబానికి చెందిన రాజు (నవీన్ పొలిశెట్టి) పేరుకు మాత్రమే గొప్ప వంశావళి, చేతిలో మాత్రం చిల్లిగవ్వ కూడా ఉండదు. కారణం… అతడి తాత గోపరాజు. పేరు జమీందార్ అయినా, ఆస్తులన్నీ రసికత్వంలో ఊడ్చేశాడు. ఫలితంగా రాజుకి మిగిలిందల్లా జమీందార్ మనవడు అనే ట్యాగ్ మాత్రమే. ఈ పరిస్థితుల్లో జీవితాన్ని సెట్ చేసుకోవాలంటే డబ్బున్న అమ్మాయిని పెళ్లి చేసుకోవడమే బెస్ట్ అని ఫిక్స్ అవుతాడు రాజు. అలా అతడి దృష్టి పడేది పెద్దిపాలెం గ్రామానికి చెందిన ధనవంతుడు భూపతి రాజు (రావు రమేష్) కుమార్తె చారు (మీనాక్షి చౌదరి)పై. కోట్లకు పడగలెత్తిన ఆస్తులు ఉన్నాయని తెలుసుకున్న రాజు, “ఆపరేషన్ చారు” అంటూ పెద్ద స్కెచ్ వేస్తాడు. అన్నీ అనుకున్నట్లే జరిగి, భూపతి రాజు గ్రాండ్గా పెళ్లి జరిపిస్తాడు. కానీ పెళ్లి రాత్రే రాజు చేతికి ఓ లేఖ వస్తుంది. ఆ లేఖ అతడి జీవితాన్నే తలకిందులు చేస్తుంది. ఆ లేఖలో ఏముంది? పెళ్లితో కోటీశ్వరుడు అవుదామనుకున్న రాజుకి తగిలిన అసలు షాక్ ఏంటి? అంతేకాదు, గ్రామ ప్రెసిడెంట్ ఎన్నికల్లో రాజు ఎందుకు పోటీ చేయాల్సి వచ్చింది? చివరకు అతడు గెలిచాడా? ఇదంతా తెరపై చూడాల్సిందే.
సినిమా ఎలా ఉంది?
“అనగనగా ఒక రాజు” కొత్త కథేమీ కాదు. గ్రామం, రాజకీయాలు, పెళ్లి, డబ్బు ఇవన్నీ మనం ఎన్నో సినిమాల్లో చూసిన అంశాలే. కానీ ఇక్కడ కథ కంటే కథనమే కీలకం. దర్శకుడు, రచయితగా నవీన్ తన బలమైన ఆయుధమైన డైలాగ్స్, టైమింగ్తో సినిమాను ముందుకు నడిపించాడు. ప్రథమార్థం పూర్తిగా కామెడీపై ఆధారపడి సాగుతుంది. రాజు పాత్ర చుట్టూ తిరిగే సంఘటనలు, అతడి బిల్డప్పులు, కవరింగ్లు, అబద్ధాల పరంపర నవ్వులు పూయిస్తాయి. “ఆపరేషన్ చారు” ఎపిసోడ్స్ అయితే సినిమాకే హైలైట్. పెద్దిపాలెం బీచ్ని గోవాగా చూపించడం, పారా గ్లైడింగ్ సీన్ లాంటి సన్నివేశాలు థియేటర్లలో మంచి స్పందన తెచ్చుకుంటాయి. ఇంటర్వెల్ ముందు వచ్చే ట్విస్ట్ సినిమాకు మంచి బలమిచ్చింది. అప్పటివరకు లైట్గా సాగిన కథ ఒక్కసారిగా కొత్త మలుపు తిరుగుతుంది. సెకండాఫ్లో కథ గ్రామ రాజకీయాల వైపు మళ్లుతుంది. ప్రెసిడెంట్ ఎన్నికలు, ప్రచారం, ప్రజల సమస్యలు ఇవన్నీ కూడా కామెడీ టచ్తోనే చూపించారు. కొన్ని సన్నివేశాలు ఊహించదగ్గవే అయినా, నవీన్ టైమింగ్ వల్ల బోర్ అనిపించదు. ప్రీ-క్లైమాక్స్లో చిన్న ఎమోషనల్ టర్న్ ఇచ్చి, చివర్లో మళ్లీ నవ్వులతో ముగించడం సినిమాకు సరైన ముగింపునిచ్చింది.
నటీనటుల నటన
ఈ సినిమా పూర్తిగా నవీన్ పొలిశెట్టిదే. వన్ మాన్ షో అంటే అతిశయోక్తి కాదు. ప్రతి సీన్లో కనిపిస్తూ, డైలాగ్స్తో, ఎక్స్ప్రెషన్స్తో ప్రేక్షకుల్ని కట్టిపడేశాడు. ముఖ్యంగా ఒన్ లైనర్లు, పంచులు నవ్వులు పూయిస్తాయి. మీనాక్షి చౌదరి చారు పాత్రలో బాగానే నటించింది. ఆమె పాత్రకు స్కోప్ ఉండటంతో నటన చూపించే అవకాశం దక్కింది. రావు రమేష్ తక్కువ సన్నివేశాల్లో కనిపించినా, తన మార్క్తో మెప్పించారు. తారక్ పొన్నప్ప విలన్గా ఓకే అనిపించాడు. మహేష్ ఆచంట, ముక్కు అవినాష్, ఝాన్సీ తదితరులు అక్కడక్కడా నవ్వించారు.
టెక్నికల్ అంశాలు
మిక్కీ జే మేయర్ సంగీతం సినిమాకు పెద్ద ప్లస్. “భీమవరం బాల్మా” పాట థియేటర్లలో మంచి స్పందన తెచ్చుకుంటుంది. బ్యాక్గ్రౌండ్ స్కోర్ సన్నివేశాలకు తగ్గట్టు ఉంది. సినిమాటోగ్రఫీ గ్రామీణ వాతావరణాన్ని బాగా చూపించింది. ఎడిటింగ్ కొంచెం కత్తిరించి ఉంటే సెకండాఫ్ ఇంకా క్రిస్ప్గా ఉండేదేమో అనిపిస్తుంది.
అంచనాలను అందుకుందా?
“జాతిరత్నాలు” స్థాయి హిట్ ఆశించినవాళ్లకు ఇది కొంచెం తక్కువగా అనిపించవచ్చు. కానీ ఎలాంటి భారీ అంచనాలు పెట్టుకోకుండా సరదాగా చూడాలనుకునే ప్రేక్షకులకు మాత్రం ఈ సినిమా ఫుల్ మీల్ లాంటిదే. నవ్వుల విషయంలో మాత్రం సినిమా నిరాశపరచదు.
ప్లస్ పాయింట్స్
- నవీన్ పొలిశెట్టి కామెడీ టైమింగ్
- డైలాగ్స్
- ప్రథమార్థం
- సంగీతం
మైనస్ పాయింట్స్
- కొత్తదనం లేని కథ
- ఊహించదగ్గ కథనం
- సెకండాఫ్లో కొన్ని ల్యాగ్ సీన్స్
ఓవరాల్గా…
“అనగనగా ఒక రాజు” అనేది పక్కా సంక్రాంతి ఎంటర్టైనర్. లోతైన కథ, బలమైన మెసేజ్ ఆశించకుండా, సరదాగా థియేటర్లో నవ్వుకోవాలనుకునే ప్రేక్షకులకు ఇది సరైన ఎంపిక. ఈ తరం హీరోల్లో నవ్వుల విషయంలో తనే కేరాఫ్ అడ్రస్ అని నవీన్ పొలిశెట్టి మరోసారి నిరూపించుకున్నాడు.
చివరగా: ఈ పండక్కి నవ్వులు పంచే రాజు… చూడొచ్చు, ఎంజాయ్ చేయొచ్చు
రేటింగ్: (3/5)
