సినీనటుడు, టీడీపీ ఎమ్మెల్యే నందమూరి బాలకృష్ణ చరిత్ర సృష్టించారు. హిందూపురం నుంచి వరుసగా మూడోసారి ఆయన విజయం సాధించారు. గత రెండు ఎన్నికల్లో కంటే ఈసారి భారీ మెజార్టీ సాధించడం విశేషం. తన సమీప అభ్యర్థి కోడూరి దీపికపై 31, 602 ఓట్ల మెజార్టీతో బాలయ్య గెలిచారు. గత ఎన్నికల్లో జగన్ సునామీని సైతం తట్టుకొని దాదాపు 90,704 ఓట్లు సాధించారు బాలకృష్ణ. 2014లో ఆయనకు 81,543 ఓట్లు వచ్చాయి.
తెలుగుదేశం పార్టీకి హిందూపురం నియోజకవర్గం కంచుకోట అన్న సంగతి తెలిసిందే. పార్టీ ఆవిర్భావం నుంచి టీడీపీయే గెలుస్తూ వస్తోంది. ఆ సంప్రదాయం కొనసాగిస్తూనే బాలకృష్ణ హ్యాట్రిక్ విజయం నమోదు చేశారు. గతంలో ఎన్టీఆర్ సైతం ఇక్కడి నుంచి మూడుసార్లు గెలిచారు. తండ్రికి తగ్గ తనయుడిగా బాలకృష్ణ కూడా మూడోసారి గెలిచి ఆయన రికార్డు సమం చేశారు. మరోవైపు ఏపీ అసెంబ్లీ ఎన్నికల ఫలితాల్లో టీడీపీ కూటమి విజయదుంధుమి మోగిస్తోంది. టీడీపీ-జనసేన-బీజేపీ కలిసి 160కి పైగా స్థానాలను కైవసం చేసుకోనున్నాయి. గతంలో 151 సీట్లతో ఘనవిజయం అందుకున్న వైసీపీ ఈసారి ప్రతిపక్ష హోదా కూడా దక్కించుకునే అవకాశం కనిపించడం లేదు.
