సినీనటుడు, ఐకాన్ స్టార్ అల్లు అర్జున్ మీద కేసు నమోదైంది. అల్లు అర్జున్‌తో పాటుగా నంద్యాల ఎమ్మెల్యే శిల్పా రవిచంద్ర కిషోర్ రెడ్డిపైనా పోలీసులు కేసు నమోదు చేశారు. అల్లు అర్జున్ శనివారం నంద్యాల సిట్టింగ్ ఎమ్మెల్యే, వైసీపీ నేత శిల్పా రవిచంద్ర కిషోర్ రెడ్డి ఇంటికి వెళ్లారు. సతీమణి స్నేహారెడ్డితో కలిసి నంద్యాలలోని శిల్పా రవిచంద్ర కిషోర్ రెడ్డి ఇంటిని సందర్శించారు. బన్నీ రాకతో నంద్యాల ఎమ్మెల్యే ఇంటి పరిసర ప్రాంతాలు కిక్కిరిసి పోయాయి. అల్లు అర్జున్‌ను చూసేందుకు అభిమానులు భారీ సంఖ్యలో తరలివచ్చారు. అయితే ఎలాంటి ముందస్తు అనుమతి లేకుండా అల్లు అర్జున్, శిల్పా రవి నంద్యాలలో ర్యాలీ నిర్వహించారని రిటర్నింగ్ అధికారి పోలీసులకు ఫిర్యాదు చేశారు. ఆర్వో ఫిర్యాదు ఆధారంగా పోలీసులు అల్లు అర్జున్, శిల్పా రవి మీద కేసు నమోదు చేశారు.
మరోవైపు నంద్యాల సిట్టింగ్ ఎమ్మెల్యే శిల్పా రవి చంద్ర కిషోర్ రెడ్డి.. అల్లు అర్జున్ స్నేహితుడు. ఈ నేపథ్యంలో స్నేహితుడికి మద్దతు తెలిపేందుకు అల్లు అర్జున్ ఇవాళ నంద్యాలకు వచ్చారు. గత ఎన్నికల సమయంలో కూడా శిల్పా రవికి తన మద్దతు తెలియజేశారు అల్లు అర్జున్. అయితే ఈ సారి ట్వీట్ చేస్తే సరిపోదని అందుకే ఇంటివద్దకు వచ్చి రవికి మద్దతు తెలియజేస్తున్నట్లు అల్లు అర్జున్ చెప్పుకొచ్చారు. నంద్యాలకు వచ్చిన అల్లు అర్జున్‌కు శిల్పా రవి దంపతులు కూడా అదే స్థాయిలో స్వాగతం పలికారు. అభిమానులు కూడా గజమాలతో అల్లు అర్జున్‌కు స్వాగతం పలికారు. బన్నీ వాహనాల వెంట భారీ ర్యాలీగా వెళ్లారు. వేలాది మంది అభిమానుల మధ్య శిల్పా రవి ఇంటికి వెళ్లిన అల్లు అర్జున్.. ఇంటి పైనుంచి అభిమానులకు అభివాదం చేశారు.
నంద్యాల అసెంబ్లీ నియోజకవర్గం విషయానికి వస్తే సిట్టింగ్ ఎమ్మెల్యేగా ఉన్న శిల్పా రవికి వైసీపీ మరోసారి టికెట్ ఇవ్వగా.. టీడీపీ మాత్రం సీనియర్ నేత ఫరూక్‌ను బరిలోకి దింపుతుంది. భూమా ఫ్యామిలీ మద్దతుతో పాటుగా.. మైనారిటీ ఓటు బ్యాంకు కలిసి వస్తుందనే ఆలోచనతో టీడీపీ అధిష్టానం ఫరూక్‌కు ఛాన్స్ ఇచ్చింది.
