‘ఇరుముడి’ మూవీని రిజెక్ట్ చేసిన అక్కినేని హీరో.. నాగచైతన్య మంచి ఛాన్స్ మిస్ చేసుకున్నాడుగా!

Naga Chaitanya Missed Ravi Teja Movie Irumudi : మాస్ మహారాజా రవితేజ ఈ ఏడాది సంక్రాంతి కానుకగా ‘భర్త మహాశయులకు విజ్ఞప్తి’ అనే వైవిధ్యమైన ట్రయాంగిల్ లవ్ స్టోరీతో ప్రేక్షకుల ముందుకు వచ్చిన సంగతి తెలిసిందే. బాక్సాఫీస్ వద్ద ఈ చిత్రం ఓ మోస్తరు విజయాన్ని అందుకున్నప్పటికీ, మాస్ ఆడియెన్స్ మరియు అభిమానులను పూర్తిస్థాయిలో సంతృప్తి పరచలేకపోయింది. దీంతో ఈసారి ఎలాగైనా గ్రాండ్ సక్సెస్ సాధించాలనే పట్టుదలతో ఒక విభిన్నమైన కథాంశంతో ప్రేక్షకుల ముందుకు వచ్చేందుకు సిద్ధమవుతున్నారు రవన్న.

తన సుదీర్ఘ సినీ ప్రయాణంలో ఎక్కువగా మాస్, యాక్షన్ చిత్రాలతో అలరించిన రవితేజ, ఈసారి మొదటిసారిగా ఒక డివోషనల్ (ఆధ్యాత్మిక) టచ్ ఉన్న కథతో తన అదృష్టాన్ని పరీక్షించుకోనున్నారు. గతంలో ‘నిన్ను కోరి’, ‘మజిలీ’ వంటి ఫీల్ గుడ్ హిట్ చిత్రాలను అందించిన ప్రతిభావంతుడైన దర్శకుడు శివ నిర్వాణ ఈ చిత్రానికి దర్శకత్వం వహిస్తున్నారు. ‘ఇరుముడి’ అనే ఆసక్తికరమైన టైటిల్‌తో తెరకెక్కుతున్న ఈ చిత్రాన్ని ప్రముఖ నిర్మాణ సంస్థ మైత్రీ మూవీ మేకర్స్ బ్యానర్‌పై నవీన్ యెర్నేని, వై. రవిశంకర్ ఎంతో ప్రతిష్ఠాత్మకంగా నిర్మిస్తున్నారు.

ఈ చిత్రంలో రవితేజ సరసన ప్రియా భవానీ శంకర్ కథానాయికగా నటిస్తుండగా.. సాయికుమార్, అజయ్ ఘోష్, రమేష్ ఇందిర, స్వాసిక, బేబీ నక్షత్ర తదితరులు కీలక పాత్రలలో కనిపించనున్నారు. ఇప్పటికే ఈ సినిమా నుంచి విడుదలైన గ్లింప్స్, పోస్టర్లు ప్రేక్షకుల్లో అంచనాలను విపరీతంగా పెంచేశాయి. టాకీ పార్ట్ షూటింగ్ పూర్తి చేసుకున్న ఈ చిత్రం రాబోయే ఆగస్టు 21న ప్రపంచవ్యాప్తంగా థియేటర్లలో విడుదలయ్యేందుకు సమాయత్తమవుతోంది.

ఈ కథ నాగచైతన్య వద్దకు ఎలా వెళ్లింది?

ఇదిలా ఉండగా, ఈ సినిమాకు సంబంధించి ప్రస్తుతం ఒక ఆసక్తికరమైన వార్త ఫిలిం నగర్ వర్గాల్లోనూ, సోషల్ మీడియాలోనూ విపరీతంగా వైరల్ అవుతోంది. దర్శకుడు శివ నిర్వాణ ఈ ‘ఇరుముడి’ కథను మొదట రవితేజ కంటే ముందు నాగచైతన్యకు వినిపించారట. గతంలో వీరిద్దరి కలయికలో వచ్చిన ‘మజిలీ’ బాక్సాఫీస్ వద్ద బ్లాక్‌బస్టర్ హిట్‌గా నిలిచిన సంగతి తెలిసిందే. ‘ఖుషి’ చిత్రం తర్వాత శివ నిర్వాణ ఈ డిఫరెంట్ డివోషనల్ లైన్‌ను చైతూకి చెప్పగా, కథ బాగా నచ్చినప్పటికీ ఆ సమయంలో నాగచైతన్య ఇతర ప్రాజెక్ట్‌లతో ఎంతో బిజీగా ఉండటం వల్ల డేట్స్ కేటాయించలేకపోయారట. దీంతో అనివార్యంగా చైతూ ఈ ప్రాజెక్ట్ నుంచి తప్పుకోవాల్సి వచ్చింది. ఆ తర్వాత ఈ స్క్రిప్ట్ రవితేజ వద్దకు వెళ్లడం, ఆయన వెంటనే గ్రీన్ సిగ్నల్ ఇవ్వడం జరిగింది. ఇందులో ఎంతవరకు నిజముందో పక్కన పెడితే.. ‘మజిలీ’ కాంబో మళ్లీ రిపీట్ అయ్యి ఉంటే బాగుండేదని, నాగచైతన్య ఒక మంచి పవర్‌ఫుల్ సబ్జెక్ట్‌ను మిస్ చేసుకున్నాడేమోనని సినీ విశ్లేషకులు, అభిమానులు నెట్టింట చర్చించుకుంటున్నారు.