‘శ్యామ్ సింగరాయ్’ రివ్యూ

Telugu Box Office

టైటిల్‌ : శ్యామ్‌ సింగరాయ్‌
నటీనటులు : నాని, సాయి పల్లవి, కృతిశెట్టి, మడొన్నా సెబాస్టియన్‌, రాహుల్‌ రవీంద్ర,జిస్సు సేన్ గుప్తా, అభినవ్‌ గౌతమ్‌,మురళీశర్మ తదితరులు
నిర్మాణ సంస్థ : నిహారిక ఎంటర్టైన్మెంట్స్
నిర్మాత : వెంకట్ బోయనపల్లి
రచన : జంగా సత్యదేవ్ 
దర్శకత్వం : రాహుల్‌ సాంకృత్యన్‌
సంగీతం : మిక్కీ జే మేయర్‌
సినిమాటోగ్రఫీ : సను జాన్ వర్గేసే
ఎడిటర్‌ : నవీన్‌ నూలి
విడుదల తేది : డిసెంబర్‌ 24,2021

సినిమా ఫలితాలను పట్టించుకోకుండా.. ఎప్పటికప్పుడు కొత్త జానర్స్‌ని ట్రై చేస్తుంటాడు నేచురల్‌ స్టార్‌ నాని. ఓటీటీలో విడుదలైన ‘వి’, ‘టక్ జగదీష్’ చిత్రాలు నిరాశ పరచడంతో ఈ సారి ఎలాగైన హిట్‌ కొట్టాలనే కసితో ‘శ్యామ్‌ సింగరాయ్‌’గా దాదాపు రెండేళ్ల తర్వాత థియేటర్స్‌ ద్వారా ప్రేక్షకుల ముందుకు వచ్చాడు. ఇప్పటికే విడుదలైన టీజర్‌, పాటలకు పాజిటివ్‌ రెస్పాన్స్‌ రావడం.. దానికి తోడు మూవీ ప్రమోషన్స్‌ కూడా గ్రాండ్‌గా చేయడంతో ‘శ్యామ్‌ సింగరాయ్‌’పై హైప్‌ క్రియేట్‌ అయింది. భారీ అంచనాల మధ్య శుక్రవారం(డిసెంబర్‌ 24)న ప్రేక్షకుల ముందుకు వచ్చిన ఈ మూవీని ప్రేక్షకులు ఏ మేరకు ఆదరించారో రివ్యూలో చూద్దాం.

ఘంటా వాసుదేవ్ (నానీ) మంచి అభిరుచి కలిగిన ఫిల్మ్ మేకర్. ముందుగా ఓ మంచి షార్ట్ ఫిల్మ్ తీసి.. ఆపై సినిమా ఛాన్సులు అందుకొవాలనే దృఢ నిశ్చయంతో షార్ట్ ఫిల్మ్ కోసం ఆడిషన్స్ మొదలు పెడతాడు. కానీ తన కథకు తగ్గ అమ్మాయి ఎవరూ దొరకరు. అయితే ఒక కాఫీ షాప్ లో చూసిన శ్రుతి (కృతి శెట్టి) అనే అందమైన అమ్మాయిని తన షార్ట్ ఫిల్మ్ కు హీరోయిన్ అని ఫిక్స్ అయిపోతాడు. దీనికి ఎంత మాత్రం అంగీకరించని ఆ అమ్మాయి చేత ఎలాగైతేనేం ఓకే అనిపించుకొని ఆమెతో షార్ట్ ఫిల్మ్ తీస్తాడు. దానికి మంచి పేరు రావడంతో వాసుదేవ్ రాసిన ఆ కథను సినిమాగా తీయడానికి ముందుకొస్తాడు ఒక ప్రొడ్యూసర్. ‘ఊనికి’ పేరుతో విడుదలైన ఆ సినిమా సూపర్ హిట్ అవుతుంది. దాంతో ఆ సినిమాకు బాలీవుడ్ లో రీమేక్ చేయడానికి వాసుదేవ్ కి ఆఫర్ వస్తుంది. ఆ సినిమా అనౌన్స్ మెంట్ రోజున వాసుదేవ్‌ను పోలీసులు కాపీ యాక్ట్ కింద అరెస్ట్ చేస్తారు.

వాసుదేవ్ ఎప్పుడో 50 ఏళ్ళ క్రితం ‘శ్యామ్ సింగరాయ్’ అనే బెంగాలి రచయిత రాసిన కథను మక్కికి మక్కీ కాపీ కొట్టి దాన్నే సినిమాగా తీశాడని ‘శ్యామ్ సింగరాయ్’ వారసులు అతడి మీద కేసు పెడతారు. కానీ వాసుదేవ్ తనకి బెంగాలీ రాదని, ఈ కథను తన సొంత ఆలోచనలతోనే రాసుకున్నానని, లై డిటెక్షన్ టెస్ట్‌కి కూడా తను సిద్ధమని చెబుతాడు. టెస్ట్‌లో వాసుదేవ్ నిజమే చెప్పాడని రుజువవుతుంది. అయినా సరే అది సాక్ష్యంగా చెల్లదంటారు. ఇంతకీ శ్యామ్ సింగరాయ్ ఎవరు? అతడికి, వాసుదేవ్ కి ఉన్న లింకేంటి? చివరికి వాసుదేవ్ ఆ కేస్ లో ఎలా గెలిచాడు? అన్న విషయాలు రివ్యూలో చూద్దాం.

పునర్జన్మలపై గతంలో చాలా సినిమాలొచ్చాయి. ‘మగధీర’ లాంటి సినిమాలు ఈ తరం ప్రేక్షకుల్ని కూడా అలరించాయి. ‘శ్యామ్ సింగరాయ్’ సినిమా కూడా ఇదే కథాంశంతో రూపొందింది. అయితే లైన్ అదే అయినా.. తన స్ర్కీన్ ప్లే బ్రిలియన్సీతో ఆసక్తికరమైన ట్రీట్‌మెంట్ తో ఈ సినిమాను తెరకెక్కించాడు దర్శకుడు రాహుల్. ఫస్టాఫ్ అంతా వాసుదేవ్ అనే ఫిల్మ్ మేకర్ పాత్రతో వినోదాత్మకమైన సన్నివేశాలతో కథను నడిపించి .. సెకండాఫ్ అంతా ‘శ్యామ్ సింగరాయ్’ పాత్రను ఎలివేట్ చేస్తూ ఆసక్తికరమైన సన్నివేశాలతో మెప్పించాడు. నిజం చెప్పాలంటే.. సినిమా టైటిల్ కు జెస్టిఫికేషన్ ఈ పాత్రతోనే అద్భుతంగా ఇచ్చాడు. ఆ పాత్ర చుట్టూ అల్లుకున్న సన్నివేశాలన్నీ ప్రేక్షకుల్ని కట్టిపడేస్తాయి. వాసుదేవ్ పాత్రని గతంలోకి తీసుకెళ్తూ.. ‘శ్యామ్ సింగరాయ్’ పాత్ర ఎంట్రీ ఇవ్వడం.. బెంగాల్ వాతావరణంలో ప్రజల హక్కు కోసం పోరాటం, రోసీ (సాయిపల్లవి) అనే పాత్ర పరిచయం, ఆమె చుట్టూ అల్లుకున్న సన్నివేశాలు, విప్లవ రచయితగా మారి గొప్పవాడైన తీరు అద్బుతం అనిపించకమానదు. తను చెప్పాలనుకున్న కథను ఎక్కడా డీవియేషన్స్ లేకుండా.. ప్రేక్షకుల్లో ఆసక్తి సడలకుండా.. సినిమాను ఆద్యంతం రక్తికట్టించాడు. క్లైమాక్స్ లో వచ్చే కోర్ట్ సీన్ అయితే.. సినిమాకిదే బెస్ట్ ముగింపు అనిపిస్తుంది. బెంగాలీ బ్యాక్ డ్రాప్ లోని కథైనా.. బెంగాల్ డైలాగ్స్ వచ్చిన చోట తెలుగు సబ్ టైటిల్స్ వేస్తూ ఆడియన్స్ అంటెన్షన్ ను సినిమావైపే ఉండేలా జాగ్రత్తలు తీసుకున్నారు.

ఎప్పటి మాదిరే నాని తన పాత్రలో పరకాయ ప్రవేశం చేశాడు. వాసుదేవ్ గా, శ్యామ్ సింగరాయ్ గా రెండు వేరియేషన్స్ చూపిస్తూ నానీ చెలరేగిపోయాడు. ముఖ్యంగా శ్యామ్ సింగరాయ్ పాత్రలో అయితే నట విశ్వరూపమే చూపించాడు. నానీ కెరీర్ లో ఇదే ది బెస్ట్ కేరక్టర్ అని చెప్పాలి. బెంగాలీ వ్యక్తిగా ఆయన అభినయం, ఆహార్యం, ఆంగికం, వాచకం మెప్పిస్తాయి. ఇక సాయిపల్లవి పోషించిన మైత్రేయ ( రోజీ) పాత్ర గురించి ఏం చెప్పాలి? మామూలు కేరక్టర్ అయితేనే చెలరేగిపోయే ఆమె .. దేవదాసి లాంటి అరుదైన పాత్ర దొరికితే ఇంకెన్ని అద్భుతాలు చేస్తుంది. అలాంటి అవకాశం ఈ సినిమాలో దొరికింది ఆమెకి. అద్భుతమైన నటన తో ప్రేక్షకుల్ని మంత్ర ముగ్ధుల్ని చేసింది. సినిమా చూస్తున్నంత సేపు సాయిపల్లవి ఎక్కడా కనిపించదు. మైత్రేయ (రోసీ) పాత్రే కనిపిస్తుంది. ముఖ్యంగా ప్రణవ లయ అనే పాటలో అయితే ఆమె నాట్యం, అభినయం ప్రేక్షకుల్ని మెప్పి్స్తాయి.

అలాగే శ్రుతి పాత్రలో కృతి శెట్టి అందం, అభినయం ఆకట్టుకుంటాయి. ఇక ఈ సినిమాలో చెప్పుకోవాల్సిన మరో మంచి పాత్ర రాహుల్ రవీంద్రది. శ్యామ్ సింగరాయ్ చిన్న అన్నయ్యగా గుర్తుండిపోయే పాత్ర పోషించారు. అలాగే.. ఈ సినిమా క్లైమాక్స్ కి అతడి పాత్ర చాలా కీలకం. ఆ పాత్రకి ఏరికోరి అతడ్నే ఎన్నుకొన్నందుకు దర్శకుడ్ని అభినందించాలి. మిక్కీ జె మేయర్ సంగీతం, బ్యాక్ గ్రౌండ్ స్కోర్ ఆకట్టుకుంటాయి. అలాగే. సినిమాటోగ్రఫీ కూడా మెప్పిస్తుంది. ఇక ఈ సినిమాకి సంబంధించి మరో ముఖ్యమైన అంశం ఆర్ట్ డిపార్ట్ మెంట్. బెంగాలీ నేపథ్యంలోని సెట్స్ ఈ సినిమాకే హైలైట్. కోల్ కత్తాలో కొంత పార్టే చిత్రీకరించినా.. అత్యధిక శాతం హైద్రాబాద్ లో వేసిన సెట్స్ లోనే చిత్రీకరించడం విశేషం. ముఖ్యంగా విజయదశమి రోజున కాళికా మాత విగ్రహం బ్యాక్ డ్రాప్ లో వచ్చే ఫైట్ సీన్ సినిమాకే హైలైట్. మొత్తం మీద శ్యామ్ సింగరాయ్ సినిమా నానీ కెరీర్ లో క్లాసిక్ అనదగ్గ సినిమా అని చెప్పుకోవచ్చు. ఆ పాత్రతో ముడిపడి ఉన్న సన్నివేశాలన్నీ ప్రేక్షకుల్ని ఆకట్టుకుంటాయి.

పీరియాడిక్ యాక్షన్ డ్రామాగా రూపొందిన చిత్రం ‘శ్యామ్‌ సింగరాయ్‌’. 1969 బ్యాక్‌ డ్రాప్‌ కథని నేటికి ముడిపెట్టి చక్కగా తెరకెక్కించాడు దర్శకుడు రాహుల్‌ సాంకృత్యన్‌. ఫస్టాఫ్‌ అంతా నానీ శైలీలో సరదాగా సాగేలా పాత్రలను తీర్చిదిద్దిన దర్శకుడు.. అసలు కథని సెకండాఫ్‌లో చూపించాడు. టైటిల్‌ జస్టిఫికేషన్‌ ప్రకారం చెప్పాలంటే.. సెకండాఫ్‌ నుంచే ‘శ్యామ్‌ సింగరాయ్‌’ సినిమా మొదలవుతుంది. సినిమా కథంతా ‘శ్యామ్‌ సింగరాయ్‌’చుట్టే తిరుగుతుంది. విప్లవ రచయితగా శ్యామ్‌ సింగరాయ్‌ పోరాటం.. దేవదాసి మైత్రితో ప్రేమాయణం, దేవదాసిల వ్యవస్థలోని లోపాలను అద్బుతంగా తెరకెక్కించాడు. జంగా సత్యదేవ్‌ రాసిన కథని ఎక్కడా డీవియేట్‌ కాకుండా తెరపై చక్కగా చూపించాడు. ‘ఒక తూటా ఒక్కరికే …ఒక అక్షరం లక్షల మందిని కదిలిస్తుంది’అనే ఒకే ఒక డైలాగ్‌తో శ్యామ్‌ సింగరాయ్‌ వ్యక్తిత్వం ఏంటి? అతని లక్ష్యం ఏంటో ప్రేక్షకులకు తెలియజేశాడు.

అయితే కథలో పెద్దగా ట్విస్ట్‌లు లేకపోవడం, ప్రేక్షకుడి ఊహకి అందేలా కథనం సాగడం సినిమాకి మైనస్‌. ద్విపాత్రాభినయం సినిమాలలో ఫస్టాఫ్‌ అంతా సింపుల్‌గా నడిపించడం.. అసలు కథని సెకండాఫ్‌లో చూపించడం కామన్‌. ఈ మూవీ కూడా అలాగే సాగుతుంది. ఇంటర్వెల్‌ వరకు శ్యామ్‌ సింగరాయ్‌ పాత్రని చూపించొద్దు కాబట్టి.. కథంతా వాసు, కీర్తిల చుట్టూ తిప్పారు. దర్శకుడిగా అతను పడే కష్టాలు.. కీర్తితో ప్రేమ.. ఇలా సాదా సీదాగా ఫస్టాఫ్‌ని ముగించాడు. ఇక సెకండాఫ్‌లో పూర్తిగా శ్యామ్‌ సింగరాయ్‌ గురించే ఉంటుంది. స్క్రీన్‌ప్లే కూడా అంతంత మాత్రంగా ఉంది. అయితే శ్యామ్‌ సింగరాయ్‌ గురించే తెలుసుకోవాలని సినిమా స్టార్టింగ్‌ నుంచి మనకి అనిపిస్తుంది కాబటి… స్క్రీన్‌ప్లే పెద్దగా ఇబ్బంది అనిపించదు. క్లైమాక్స్‌ కూడా సింపుల్‌గా ఉంటుంది.

జెర్సీ సినిమాలో విజువల్‌తోనే కథని పాత్రల్ని పరిచయం చేయొచ్చని చెప్పిన సానూ వర్గీస్ ఈ చిత్రంలో మరోసారి తన కెమెరా పనితనాన్ని చూపించారు. డిఫరెంట్ టింట్‌తో సినిమాకి స్పెషల్ లుక్ తీసుకుని వచ్చారు. 1970 నేపథ్యాన్ని తన కెమెరా పనితనంతో చూపించారు. మిక్కీజె మేయర్ సాంగ్స్‌తో పాటు.. నేపథ్య సంగీతం బాగుంది.. ముఖ్యంగా సీతారామశాస్త్రి రాసిన ‘సిరివెన్నెల’ సాంగ్ హైలైట్ అయ్యింది. ఆ పాటలోనే సినిమా కథ కనిపిస్తుంది. శ్యామ్ సింగరాయ్ టైటిల్ సాంగ్ బాగా కుదిరింది. వెంకట్ బోయినపల్లి.. కొత్త బ్యానర్‌లో కొత్త నిర్మాత అయినప్పటికీ నిర్మాణ విలువల్లో ఎక్కడా రాజీపడలేదు.

Share This Article